Masungula a ba nguvena : Célestin Sakanga wa ku Luiza ni Célestin Bakamana wa ku Demba Mutombo ki babidi badi bakumbana bua kulombola Kasaï central
« Misangu ya bunyi, ba nsonga kabatu basua kuakula malu abu, nansha pa bidi bitangila malu a tshididi to. Padibi amu nunku, kaba kushintulula bualu nansha bumua nansha bua bidi bibatangila. Kadi pikalabu badifila pabu ni muabu monso bua kudibueja mu miaba idi mapangadika mikala angatshika, majinga abu onso neakumbana, bualu kakuena mukuakuidi anyi mukuambuluishi muimpa kupita wewa nkayeba », ki mualeji Bakamana Célestin kumpala kua ba kamona kamba betu mu dibidi diashadi edi, munemu mu Tshinsansa.
Bakamana pamue ni muinenda, mbasua kulongolola midimu ya mbulamatadi biakana, mu mushindu wa kupesha ba nsonga muaba bua kuenzelabu province wabu midimu mu bitupa bionso.
« Nanku tudi basua bua kuandamuna ku majinga onso a ba nsonga, katuyi tuteka bakulumpa ku luseka nansha », Ki mumvuiji Célestin Bakamana kabidi ukumbaja ni : « Tudi tukangula mesu bua bansonga bonso pa ntatu ni makenga idibu bikala batutakanangana nayi mu malu abu onso a buatshia buila ».
Nanku mbua musangu wa kumpala bua kumona mu province wa Kasaï central, ba nsonga babidi bikala ni bidimu muinshi mua makumi anayi bikala bafila mpala bua kulombola province eu. Wa kumpala ku Célestin Sakanga wa ku Luiza bu gouverneur ni tshindonda tshienda Bakamana Célestin wa ku Demba Mutombo.
Bua bakalenga aba babidi, bidi bikengela kulongolola province mu bitupa bienda bionso bua kumona mua kuakaja makalenga biakana kudi ba nsonga ba tshitembu. Bualu ba tatu ba kala bavua balombola Kasaï central wetu eu kakuyi ni ngelelu wa menji muakana, kakuyi muina wa kuabanyangana nenda ngenyi nansha.
Bua kufika ku dienza malu onso aa, bidi bikengela bua kulongolola mianda yonso munda mua province wetu bidi kabidi kutamba kutabalela nangananga tshilumbu tshidi tshitangila: mayi, nzembu, njila, mpitadi, tulasa,...
Katupu moyi bua se, njila wa Kalamba mbuji udi utuangaja Kasaï kanena konso mu bujima buaku. Ni kabidi udi mua kutuangaja province wetu ni matunga makuabu a ku ba benda. Kupanga kua njila ni bikuabu bionso bituatedi ebi nkuimanyika bionso bia kuetu kuneku.
« Tudi tuela menji se, bansonga bobo babangisha kulombola Kasaï central kakuyi muntu ubatatshisha, netubikila bamanyi bapiluke ni bena mfualanga ya bunyi badi bakeba manema a mu malaba bua kulua kutuashila bibambalu binena, kutulongoluela njila, kutuelela mayi ni nzembu,... Bionso ebi mu dishintulula dia manema etu a mu malaba adi Mvidi Mukulu Maweja wa ba nyinka mutupeshe bu mudi: diamant, or, cuivre, coltan,...»
Bua kujikija Bakamana weleja bua se padibu amu babasungula ba wetu ni basanka bikola ni kupuabu moyi kasuba kavuabu bamona kudi ba nguvena ba kala bavua mena abu mikala abangishisha amu ni dileta dia K. bu mudi Kapuku, Kabatusuila, kabasubabu, Kabeya, Kamukunyi, Kabuya,...
Ke kayi mema Bakamana katshia ngafila mpala kunsungulabu bu nguvena tshindonda, tshiena ndala, ndi amu ku diba ni ku diba ndiebeja, ndiela makonka pa tshindi bua kuenza bua bana ba mu Kasaï central kusanka kudiabu ni kutshionkomoka.
