RDC : Kakuena dimanyika dia tshidimu tshia tulasa nansha mu misoko idi ndululu, kadi ni kuikala diakajilula dia tshidimu etshi miaba eyi
Tshidimu tshia ndongeshilu tshia 2024 - 2025 katshiena mua kuikala tshia dimakajila tulasa mu miaba idi ndululu Ku luseka ludi diba dipatukila dia Ditunga dietu nansha. Ki bidi Mena mutangidi wa malu a ndongeshilu Raissa Malu muleja mu dibidi dia matuku 4 ngondo muisatu eu tshidimu tshia 2025, kumpala kua ba kamona Kamba wa nseya.
Bua Mena Raissa, ne kuikala tshidimu tshiakajilula bilondangana ne ndongamu wa ndongeshilu wa mu ditunga dietu mu misoko idi mikala mu bianza bia ba ntomboji ba M23.
" To, tshidimu tshia kuimanyika malongesha katshiakuikalaku nansha, bualu ni tuteka mu tshialu tshienzedi tshikumbana bua kumona bua kuakajilula ndongamu wa ndongeshilu mu misoko eyi idi ne mvita. Nansha muvu balongi ba bunyi kabayi baya mu tulasa matuku mulongo; ne tuenza ne muetu monso bua kumona mua kulongolola malu nangananga pa kujoja bitupa binena bia ndongamu wa ndongeshilu bua se bana bamona mua kujikija tshidimu etshi biakana", ki mualeji mena Raissa Malu.
Bukalenga bua ditunga dietu dia Congo wa mungalata bualeja bipeta bibi bitamba bidi mvita idi mituela kudi ditunga dia Rwanda bibueja mu ditunga dietu. Tuamba se, bilongelu bitua Ku 2500 mbinyanga, balongi batua Ku mbombo mujima Badi bikala munkatshi mua lutatu elu.
Ku Nord Kivu, bilongelu 1483 mbikanga. Bikuabu 35 mbinyanga bionso, bilongelu bikuabu 45 mbishala kabitshiyi ne bibasa nansha. Tukuata kabidi se, bilongelu 3 mbishala tshisombelu ni miaba ya diangatshila ngenyi ya mvita kudi ba ntomboji ba M23. Binga bilongelu lelu mbabishiya nkita bua kuikalabu bajika bantu badibu bikala bashibeya.
