Nzubu wa ba tshihuita munua mfuanka : Christophe Mboso wambi ne udi ufila mpala bua kufuila nkuasa bua kulombola nzubu eu
Udi muikala mulombodi muibidi wa nzubu wa ba tshihuita munua mfuanka ki muena muabu Christophe Mboso N'Kodia Pwanga, waleji patoka dijinga dienda dia kuikala mfumu mulombodi wa nzubu eu pa kupinganjina Kamerhe Vital udi mulekela nkuasa eu Ku bukola.
Kumpala kua ba kamona Kamba wa nseya, Mboso waleji se, yeya udi muikala ne mamanya mapiluke a bunyi bua kulombola nzubu eu, bilondeshila bikadiye muenza ne kabidi ne pa kutangila mu bidimu bidiye muikala nabi mu malu a tshididi ne a dilombola. Bu mu tshidiyi ne moyi, udi witaba pa lukasa bua kulua kuambuluisha ditunga dienda musangu onso udibu bamubikila.
" Ndi pabuipi bua kuikala musadidi wa ditunga dianyi, ne kufila mamanya anyi onso bua dikalangana dimpe dia nzubu eu wa ba tshihuita munua mfuanka, bua ditunga dietu diya kumpala", ki muambi Mboso.
Mpala wa Mboso mu dijinga dienda dia kuikalayi kabidi kumpala kua ba tshihuita munua mfuanka bu mulombodi, yeya ukavu mulombola muina nzubu eu katshia Ku 2021 tooo ni mu 2024, e kushila Kamerhe vital nkuasa mu tshienzedi tshia ndomboluelu mupiamupia munkatshi mua tshisumbu tshia Union sacrée, kuntuadijilu wa bukalenga ebu bupiabipia bua mfumu Tshilombo wa Tshisekedi bua musangu eu muibidi.
Mvita ya kulombola nzubu wa ba tshihuita munua mfuanka mimueka mikola. Bualu mpala mikuabu minene ikadi kabidi midileja bu mudi, Jean Baudouin Mayo Mambeke, muena mu tshisumbu tshia Vital Kamerhe UNC, Aimé Boji Sangara Mena wa kala ne muena UNC eu kabidi amu nanku.
Masungula aa a mulombodi mupiamupia wa nzubu wa ba tshihuita munua mfuanka ne enzeka mu matuku makese emu, bilondeshila kabala matuku kafilabu kudi mulombodi eu wa tshitupa tshikesa wa muena nzubu eu muleja.
