RDC : Ntuadijilu wa diumbuka dia bena MONUSCO mu ditunga dietu kubangila mu ngondo wa tshisua munene tshidimu etshi
Kumpala kua tshipangu tshia 78 tshia Nations-Unies, mfumu wa ditunga Félix Antoine Tshisekedi Tshilombo waleji bua se bikengeka bena MONUSCO bumbuka mu ditunga dietu kubangila mu ngondo wa tshisua munene, tshidimu tshitudi natshi etshi.
Mfumu wa ditunga Félix Tshisekedi waleji patoka bua se ngenzelu wa bena Monusco ki mufila bipeta biakana nansha bua kufila bupola mu ditunga dietu. Tshisekedi Tshilombo waleji bua se, bantu kabena bakubibua to, bupola buina buvuabu baluila ki mbubuela nansha, mpindieu mudimu wabu udi bua tshinyi? Nanku tuakolu, tudi nkayetu tudikolela, tudiambuila nkuruse wetu, bua kukeba bupole mu ditunga dietu. Bualu banengi be, kukadi bidimu bitua ku 25 bidibu amu mu ditunga dietu emu, bikengela bumbuka mpindieu.
Bualu diumbuka diabu edi ndilombibue bikola nangananga kudi bana ba muena Congo badi balomba bua se Monusco umbuka bualu kena ni mudimu muimpa udibu benza nansha umue to. Bakuabu ba muena ntanda mbafila to ni mioyo yabu bafua amu bua se bena monusco bumbuka. Ba ndekelu ngaba ba mu tshimenga tshia Goma mu matuku 30 a ngongo eu wa 8, mbafua amu bua se bena Monusco bumbuka.
