Madisuisha a dikeba bu mfumu bua ditunga: Ku Bukavu, Katumbi walayi ni neatshimune bisumbu bionso bia ba ntomboji nangananga ba M23
Mu tshimenga tshia Bukavu, tshimenga tshikuku tshia province wa Sud - Kivu, katumbi muimana kumpala kua musumba wa bantu mu dimue dia matuku 27, ngondo eu wa 11, wambi bua se bena ku luseka eku bua se bobo bamusungula bukubi kubi nebuikale yenda mvita minene bua kubueja bupole.
Katumbi walayi se, padiyi amu ulue mfumu wa ditunga, udi ujikija bimvundu bionso bidi ba ntomboji bikala batuela. Nangananga mu ma Kivu ni mu Ituri. Ne atuta bantomboji bonso ne kubashibeya kabidi, bakuabu mu maloku.
Kakufuila ba M23 lusa to. Nansha mudi Rwanda muikala ubatua nyama ku mikolu. Wambi ne yeya ka kuikala mfumu mulalakanyi bua wenda udilakana tshianana tshianana kumpala kua bantu kayi ukuba ni ukeba menji a dikuba bantu nansha.
" Ndi ni tshia bua kujikija mvita yonso mu ditunga dijima, mu ma province onso adi ni ndululu, bu mudi Kivu yonso mujima ni mikuabu. Mfumu wa ditunga kena mua kuikala amu mukalenga wa didilakana to. Tudi tujikijangana ni ba ntomboji bonso kakuyi lusa nansha. Netupesha biluilu bia ditunga dietu bionso bidibu bakengela bua kuluanganabu kakuyi bilela to", ki muambi Katumbi nanku.
Mu diakula dienda Katumbi waleji kabidi se, Félix Tshilombo ke udi mulua ni ba M23 aba bua bikala baluisha ditunga dietu, mu miyiki ivuayi muenza nabu ku Tshinsansa.
Katumbi uvu mufika ku Bukavu mu diumbuka dienda ku Idjwi, mu province wa Sud Kivu, muvuyi kabidi muakula ne bena kuina ku musoku eu.
