Dibuela dia bena Rwanda ku bukola mu ditunga dietu: « Mfumu wa ditunga udi muikala mudisunguila bantu ba bukitu e kubapesha biluilu bionso bia mvita bua kuluangesha ba ntomboji ni ku batshimuna », biamba kudi Vital Kamerhe
Mfumu wa ditunga dietu Félix Antoine Tshisekedi Tshilombo uvu muakidila mu nzubu wenda wa mudimu anyi cité de l'OUA, mulombodi wa assemblée nationale, Vitale Kamerhe mu disatu dia matuku 7 a ngondo eu wa muanda mukulu tshidimu tshitudi natshi etshi.
Miyuki yabu yonso ivu mikala inyunguluka ku malu adi atangila mianda idi mu tshialu munkatshi mua ditunga dietu mu meba atudi tuakula aa, bu mudi mvita mituela kudi ditunga dia Rwanda ku luseka ludi diba dipatukila dia ditunga dietu.
" Mfumu wa ditunagaa kena utangila bukesa bua bienzedi anyi bua dimona dia ditunga dietu to. Udi muikala munkatshi mua didisunguila bantu ba bukitu ni kubapesha biluilu binena bua bamona mua kuluangesha bena Rwanda ni kusungila ditunga dia Congo wa ba nkambua", ki mueleji Kamerhe vital nanku.
Nanku mfumu wa ditunga dietu ni muenyi wenda eu Kamerhe bavu kabidi belangana menji pa malu adi atangila manema ni mabanji bia ditunga dietu, bu mudi dipueka dia mfualanga yetu kumpala kua ndola.ya muana muena Amerika.
Ki muambi Kamerhe ni: " mfumu wa ditunga dietu udi muikala ututa tshianza pa mesa bikola bua kuambila bapanyi bonso ba bintu ku tshi bunyi se, balekela kubandisha bintu mishinga pa kuela makasa adi kaayi pa wowo nansha".
Bua pa kuteleja bena tudiomba tua mfumu wa ditunga, matuku adi kumpala eku, ni kuenzeka tshipangu tshinene pankatshi pa mfumu wa ditunga, mamu mulombodi wa bukalenga buetu ni mulombodi wa Assemblées nationale bua kutangila malu manene adi mikala atatshisha ditunga dietu.
