Mvita ku luseka lua Est wa ditunga: Diangata dia Bunagama didi dipangisha Nord-Kivu mfualanga mbombu mujima wa ndola ya bena amerika ku ngondu yonso ( bifunda mu mukanda mutoka)
Province wa Nord-Kivu, katshia batunyenga musoku wa Bunagana kudi ba ntomboji ba M23, tudi tujimija makuta mbombu mujima wa ndola ya muana muena amerika ku ngondu yonso. Bionso ebi mbifunda mu mukanda mutoka, mifundu eyi idi ileja malu adi menzeka ku luseka lua Est katshia mvita eyi yabanga, bibi bidi ba ntomboji bikala benza, ni bidi ditunga dietu dikala dipanga pa dipanga kuikala ni disu ditonona pa mikalu ya ditunga dietu ku luseka eku.
Mukanda eu mba wela patoka kudi ba kamona kamba mu dinayi edi dia matulu 14, ngondo utudi nenda wa kabitenda eu kudi bukalenga bua ditunga dietu, bua kuleja bibi bienza kudi mayobu a bukalenga bua ditunga dia Rwanda mu ditunga dietu. Mu kadiosha ka mukanda eu, badi baleja makuta avu ditunga dietu dipeta kumpala kua mvita eyi kubanga mu 2020, ni mpindieu makuta atudi tujimija katshia mvita yabanga. Bualu mu 2020, tuvu tupeta mfualanga mbombo 17 ya mfualanga yetu, kadi lelu kabiena kabidi nanku nansha.
Mukanda eu mutoka udi uleja kabidi ni bantu batua ku mbombo mujima bikala ni bidimu bikumbana bua kuya ku masungula, kabakuya nansha bualu bimvundu mbipite bunyi ku luseka eku, kamuena mushindu wa kubenzejila masungula nansha.
Uvu muleja muina mukanda eu kumpala kua ba kamona kamba uvu muikala mena Muyaya Katembue Patrick, pamue ni muinenda wa malu a bilumbu ni a tubadi. Bukalenga buetu budi buenza ni muabu monso bua kujikija mvita eyi, kadi bena tshinyangu ni bena mutshima wa makuta ni mabanji adi ku luseku eku kabena bajinga kulekela mvita ni bimvundu nansha.
