Bukalenga bua Suminwa II: « Tshidi Batontolodi balua mpindieu tshinganyi mu tshihangu tshia ba tshihuita munua mfuanka ? » ke mudi Damien Kapay udiela lukonku
Dienzulula dia bukalenga bua ditunga dietu katshia Ku matuku 8 a Ngondo eu wa tshimungu wa mashika kudi mfumu wa ditunga Félix Tshisekedi, didi dikala munkatshi mua diakuisha ne dielesha menji mbena ntanda ba bunyi mu ditunga dietu, nangananga pa kumona mpala mienyi ya batontolodi mu bukalenga ebu. Muena ntanda Damien Kapay Shiyu, muedi wa menji ne mulaki wa mukana mu tshilongelu tshia bukebi kebi tshia Ebuteli udi udiela lukonku lua kumanya tshidi batontolodi balua munda mua ditunga dietu.
Bua muenenu wenda wa malu, dishintuluka edi didi dilua mu tshikondo tshidi bimvundu ne ndululu ya bunyi bikala mu ditunga dietu dia Congo wa ba nkambua. Nangananga Ku luseka ludi diba dipatukila dia ditunga kudi kuikala ba ntomboji ba M23, badi bapeta diambuluisha kudi ditunga dia Rwanda, bidi bienza bua se tshididi tshikala tshienzeka mushindu mukuabu nangananga bua ba tshihuita munua mfuanka.
Kudi kumueneka bitupa binena bididi mu tshipangu tshia pa tshihuita munua mfuanka : Dihueka dia ngakuilu wa batontolodi ne muenenu wa malu mupiamupia mu tshitupa tshia ba bunyi anyi majorité a ba tshihuita munua mfuanka.
Mu difuimba dienda dia ngenyi miela mu buntatanda mu biahu bia talatala.cd, Kapay udi muikala udibueja mu tshitupa tshia Dypro dia Constant Mutamba ne tshia Nouvel Élan tshia Muzito ne bukalenga bua Suminwa. Tshienzedi Tshidi tshikala tshipuekesha ngenzelu wa mudimu wa batontolodi mu tshihangu tshia ba tshihuita munua mfuanka.
Nzubu wa ba tshihuita munua mfuanka udi muikala Ku kakesa kakesa uhanga meyi a batontolodi bua kulua yonso wakula amu diyi dimue, kabiena bimpa bua mungalata wetu nansha.
Bua muena ntanda eu udi muikala mu bulongi bua mu bu ngangabuka mu tshilongelu dia Université wa Tshinsansa, bidi bikengela kuikala méyi abidi kudi ba tshihuita munua mfuanka, banga mu bukalenga, bakuabu bu batontolodi bua mungalata wetu uya kumpala.
