Kupona ya mvula 2023: Félix Tshisekedi me baka lusakumunu ya tata Simon Kimbangu na Nkamba
Na kizunga ya Kongo central, yandi zietaka sambu na manaka ya pona mono-pona mono, mfumu ya insi mpi mosi na kati ya bantu ke nuanina kiti ya kimfumu ya insi, zietaka na nkamba na kilumbu ya iya ya sabala yayi na nkokila.
Na masolo na bau ti tata Simon Kimbangu Kiangani, ntuadisi ya dibundu ya « Kimbangu », mfumu ya insi lombaka lusakumunu ye, yandi bakaka yau na zina ya nzambi mvangi ya zulu ti ya ntoto sambu yandi vutukila diaka kiti ya kimfumu na yandi na nzila ya kupona.
Na manima ya masolo yina, Félix Tshisekedi sololaka mpi na nkangu ya cité ya Nkamba. Na nsualu, yandi lombaka na bau ba pona yandi na kilumbu ya makumi zole ya ngonda yayi sambu na kumanisa kisalu ya ntomosono ya insi, yina yandi yantikaka banda ba mvula me luta.
Na nsuka ya nzietelo nandi na cité NKAMBA, mfumu ya insi bakaka ditoma ti kintuadi nandi ya pona mono-pona mono, na kuenda na Mbanza ya Mbanza-Ngungu, kulutila diaka na cité ya Kasangulu kuna yandi lombaka mpi na nkangu ba pona yandi, na ntuala yandi vutuka na mbanza Kinshasa na mpimpa ya ngolo.
Bisika yonso Félix Tshisekedi lutaka, bantu vuandaka na kiese na kuwa yandi, ye mpi me ndima kupona yandi. Kilumbu ya makumi zole ya ngonda yayi, beto ta tala inki mutindu bidimbu ya kupona ta vuandila sambu na ba yina yonso pesaka kumbu na bau, ba congolais pona bau bonso mfumu ya insi.
