Kupona ya 2023 : Félix Tshisekedi mene ndima kubika kiti ya kimfumu kana muntu ya nkaka mene nunga « na mbote mbote »
Félix-Antoine Tshisekedi ta bikala na kimfumu ya bwala ve kana yandi mene nunga ve na kuponama ya kilumbu ya makumi zole ya ngonda ya kumi ya mvula yayi (20 décembre prochain). Mfumu ya insi mene tuba buna na disolo ya pesaka na ba mwangisi ya nsangu ya Financial Times na mbanza Kisasa.
Na disolo ina, Félix Tshisekedi mene tuba nde « kana muntu ya nkaka mene nunga na kuponama, kana mono mene bela na mbote-mbote, beto ta ndima yau », buna yandi tubaka.
Na banwanini ya kiti ya kimfumu ya opposition, Félix-Antoine Tshisekedi mene lembisa ntima ve. Mfumu ya insi mene tuba nde « kuponama yakele kwisa ta vanda ya masonga », na ntwala a bakisa nde « bantu ya opposition mene tula makelele ya bantu ya communauté internationale kele kuwa ».
« Ba nwanini ya kiti ya kimfumu ya opposition bingaka [bamfumu ya CENI] ba miyibi. Kansi bau mene kwisa kunwana kiti ya kimfumu na kuponama yayi. Bau mene kwisa sambu bo zaba nde bau lenda kununga ».
Inzi na betu Kongo demokratiki kele tambula bilumbu yayi na milulu ya pona mono-pona mono (campagne électorale). Na kilumbu ya makumi zole ya ngonda ya kumi ya mvula yayi (20 décembre prochain), nkangu ta pona ba mfumu ya nkaka.
