Olive Lembe : « bau mene kutinda bimpumbulu ya Force du progrès sambu naku fwa mono »
Bimpumbulu ya Force du progrès mene nwalisa bantu ya kele kengelaka nzo ya mfumu ya insi ya ntama, Joseph Kabila, na kilumbu ya makumi tatu na mosi ya ngonda ya nsambwadi ya mvula yayi (31 juillet) na mbanza Kinshasa.
Sambu ya Olive Lembe, nkento ya mfumu ya inzi ya ntama, bimpumbulu yina tindamaka sambu naku fwa yandi.
« Mono ke lomba na mfumu ya bwala yayi naku tala bimpumbulu yayi ya kele ku sala mavwanga. Bamene songa mono nde bo kele batu ya UDPS. Yo kele sala mpasi mingi kibeni », yandi tubaka mpidi yina.
Bo vanda nkama na ndambu, bimpumbulu yina. Ba mpulusi ya kwisaka na kisika yina mene kanga kumi. Ba nkaka mene tina.
